Një delegacion i Kolegjit të Shkencave Mjekësore “Alma Mater Europaea – Campus College Rezonanca”, i udhëhequr nga Prof. Asoc. Dr. Fadil Hasani dhe Prof. Ass. Dr. Lavdim Ymeri, së bashku me studentë të drejtimit Radiologji, zhvilloi një vizitë studimore në Akademinë e Kosovës për Siguri Publike (AKSP) në Vushtrri.
Qëllimi i vizitës ishte njohja e studentëve me misionin, rolin dhe funksionimin e AKSP-së, si dhe forcimi i bashkëpunimit ndërmjet dy institucioneve. Delegacioni u prit nga z. Avni Istrefi dhe z. Shaban Bajrami, të cilët prezantuan strukturën organizative dhe kapacitetet trajnuese të Akademisë, si dhe zhvillimet më të fundit në fushën e sigurisë publike.
Gjatë prezantimit u theksua rëndësia e AKSP-së si institucion përgjegjës për trajnimin dhe arsimin e lartë të të gjitha agjencive të sigurisë publike në vend, përfshirë Policinë e Kosovës, Shërbimin Korrektues, Shërbimin Sprovues, Doganën e Kosovës, Agjencinë e Menaxhimit Emergjent dhe Inspektoratin Policor.
Stafi akademik i Kolegjit diskutoi me përfaqësuesit e AKSP-së për mundësitë e zgjerimit të bashkëpunimit dhe rëndësinë që vizita të tilla kanë në zhvillimin profesional të studentëve të Radiologjisë.
Gjatë qëndrimit në Akademi, studentët vizituan ambientet trajnuese, laboratorët dhe hapësirat profesionale ku zhvillohen programet e trajnimit, duke përfituar një përvojë të drejtpërdrejtë dhe të vlefshme praktike.
Kolegji “Rezonanca” falënderon Akademinë e Kosovës për Siguri Publike për mikpritjen dhe bashkëpunimin e ofruar, duke rikonfirmuar përkushtimin në zhvillimin e aktiviteteve studimore dhe projekteve të përbashkëta në të ardhmen.
