
Studentët e vitit të tretë të Departamentit të Infermierisë në Kolegjin AMECC “Rezonanca“ zhvilluan një vizitë studimore në Qendrën Mjekësore të Forcës së Sigurisë së Kosovës (FSK), Kazerma “Adem Jashari”.
Gjatë vizitës, studentët u shoqëruan nga stafi akademik – Lec. Shpresa Makolli, Lec. Bekim Sejdiu dhe Lec. Hasan Gashi, si dhe u pritën nga Kolonel Dr. Xhevdet Tahiraj dhe Rreshter Major Komandues Ilir Rama.
Në kuadër të kësaj vizite, studentët u informuan mbi historikun, organizimin dhe shërbimet e mjekësisë ushtarake në FSK. Ata patën mundësinë të njihen nga afër me departamentet specialistike, të eksplorojnë autoambulancat dhe pajisjet e specializuara për emergjenca. Gjithashtu, ata ndoqën trajnimet dhe ushtrimet e ushtarëve të FSK-së, të zhvilluara nga instruktorë të certifikuar nga NATO në fushën e mjekësisë ushtarake, me fokus të veçantë në situatat emergjente fushore.
Ky aktivitet u realizua në kuadër të bashkëpunimit akademik dhe synon të ofrojë një përvojë praktike për studentët, duke forcuar lidhjen mes njohurive teorike dhe praktikës profesionale në fushën e infermierisë dhe mjekësisë emergjente.